Skatbrüder Hein, Fide, Erni un Kalli
De veer Senioren sitten reihüm komodig bi Hein in de Stuuv. All 14 Dag ward ümschichtig Skat üm 5 Cent speelt. Een nees Blatt liegt ob den Disch, dat gift Kaffee, un wer mag, kreeg een Kööm un een Buddel Beer. Se kennt sik all 40 Johr un wünscht sik hüüt veel Glück. Hein is plietsch, een Skatfuchs, Fide geiht jümmer vörsichtig ran, Erni neigt to`n Schummeln, un Kalli is een beeten drümmelich, dat mogt de Sog interessant. Erni drinkt een Beer un sett een Null ouvert in Sand. Fide meent: „Dat is wunnerbor loopen.“ Erni ward wrörgelich un schimpft ob Fide.
Hein fangt an to philosophieren: „De heele Welt speelt verrückt. Präsident Trump mokt dat as Erni – he bringt de heele Welt dürcheenanner un meent, he is de Beste.“ Erni speelt nu den Beleidigten. „Jo, jo“, segt Fide, „he hett Bammel, dat Trump de Wirtschapp rünner fohrt un sien Beamtenpension in de Grütze geiht.“
Kalli hett in sien groden Goorn Kantüffeln, Wuddeln, Kohl un Salat plant. He meent, em kann solicht nix passieren. He ward sik, wenn de Eier to düer ward, Hühner anschaffen – he ward in Tokunft Selbstversorger. Nu kreeg Kalli een Bombenblatt. Erni schult in Kallis Blatt un hält dagegen. Dat ward spannend un Kalli tellt to`n Sluss 61 Punkte. Erni wull dat nich wohrhebben un tellt no – 60 Punkte. Hein tellt no un tellt für Kalli 61 Punkte. Dat hett, Kalli hett wunnen. Nu ward Erni wedder wrörgelich un segt: „Ik will ju watt seggen, Trump is gor nich mol slecht. He schüttelt de verdammten Politiker mol örnlich dürchenanner. Dat brukt de verrückte Welt.“ Hein meent: „So geiht dat nich, denn een öberspöönschen Präsidenten brukt blots ob den roden Atom-Knopp drücken un wi goht alltwei.“
Fide will leeber Skat speelen, mischt de Korten richtig dörch un segt: „Uns blifft nix anners öber as aftotööben, wat de Tokunft bringt. Bi Politiksnaggerie sünd all veele Fründschaften kaputtgohn, dat wüllt wi doch nich! Lot uns doch beeder wiederspeeln un von wat anners snaggen! Kiek mol no buten in de scheune Natur. De to schonen, segt min Enkelkinner, möt wi veel mehr don, sonst goht wi all kaputt. Ik bin mit Fahrrad hier un tohuus hebt wie een E-Auto un een Solarplatte ob uns Dag. Erni meent, för sowat hett he keen Geld.“
Hein hett de Skatkass un een Vörschlag: „Wenn wi örnlich Geld in de Skatkass hebt, mokt wi een Paddeltour ob de Alster, wi kehrt im Haselknick in un ik vertell juch bi Kööm un Beer Alstergeschichten von de Transportschuten, de de Muersteens von de Trillup–Ziegelei no Hamborg schippert hebt un von den Alsterkanal, wo se öber Sülfeld bit no Lübeck schippern kunnen.“
Se speelt noch 10 Runden, un no dat dritte Beer ward dat jümmer komodiger. Kalli hett een goodes Blatt un smitt de verkehrte Kort. All fangt an to lachen, Kalli ok. He smitt de Korten ob den Disch – dat kommt von de verdammten Kööm.
To´n Sluss nimmt Hein de Skatlist un rechnet ab. 38,25 Euro goht in de Skatkass. „Wi brukt blots noch een Termin för uns Paddeltour.“ Se sing „So ein Tag, so wunderschön wie heute, so ein Tag, der dürfte nie vergehn!“
Fide is in 14 Dag dran. Se wünscht sik gegensidig goode Gesundheit un freiht sik ob een Weddersehen.
Hinni Jürjens
