Klönschnack

8. Dezember 2017

TOPOGRAPHIE VUN DUVENSTEDT

Wenn du de Topograhie vun uns Dörp ankieken deist, denn markst du, dat wi meist vun Bargen inkreist sünd: An de Poppenbüttler Chaussee, doar woneem hüttodags de Bohmschool vun „Pflanzen-Körner“ is, liggt de  Bocksbarg un een Stück wieterlangs de Bökenbarg. Up de anner Siet hebbt wi den Steenbarg – de Weg dorup hett bi de Kinner in`t Dörp „Appelweg“ heeten, wiel dat doar up beide Sieten vun de Straat veele Appelbööm geev (doar kunst jedet Johr in` Harvs bannig veel Äppel klauen).
Baben up`n Kakenhan gifft dat den Parkberg, Panzerbarg un den Schaarbarg. Im Dörp, achter den Duvenstedter Küsel, an de Eck vun den Tangstedter Weg, hebbt wi den Krietbarg mit den lütten Gedenksteen vun den Krieg 1870/71 un wietaff, achter Wulksfelde, liggt de Büttsbarg (Kompostwerk).
Meern in`t Dörp hebbt wi den Hökerbarg (kiek di mol de Inschrift vun den Steen an) un dicht dorbi, achtern Farkenwisch, hebbt wi den Achterbarg. Güntsiet vun de lütte Kaat vun Uwe Berner liggt jo de niege Straat, de se

Duvenstedter Berg nömt hebbt…

Fröher harrn wi an`n Ellernbusch ok noch een Lokol, dat  „Zur Sennhütte“ heeten hett, jüst doar, woneem hüt dat  griechische Restaurant is.

Wenn du di besinnen deist, muss du meist dinken, du büst wietaff jichtenswo in Bayern bi de Lüüd mit de Ledderbüxen. Dralle Deerns mit orrig „Holt vör de Döör hebbt wi hier ok! Hier fehlt blots noch een Skilift! Dat kann je meist nich angahn, dat wi hier rundüm so veel „Bargen“ hebbt. Uns Vöröllern hebbt je wol jedeen lütten Hümpel „Barg“ nöömt… Obers ok ohne de veelen Bargen liggt uns Duvenstedt in een wunnerscheune Gegend – Ski-Touristen brukt wi hier nich.

Uwe Berner