Klönschnack

8. Dezember 2017

De Alsterschlacht am Haselknick

Dree Duvenstedter sitten im Duvenstedter bi Köm un Beer.
De een vertellt, he hett een Kanu schenkt kreegen, för 6 Personen, He segt: „Ik geef dor ob noch een Köm un Beer ut.“ De Tweete: „Wenn du dat Vollschipp to Woder bringst, un mi dormit ob de Alster nohuus föhrst, geef ik ok een Köm un Beer ut.“

De Dritte harr de Idee, ob dat Vollschipp könt se noch dree Froonslüüd mitnehm. Se frogen de een un annere, ob se nich Lust harr mittoschippern, keen een wull mit, dat wür argerlich !
Se nehm sik nu een Kassen Beer un een Buddel Köm, setten dat Boot in`t Woder un de Reis güng ohn Froonslüüd los. Noch mol anhollen un fastmoken, een wackeligen Bootssteg kreegen se foot, Beer un Köm wer noch dor. In Öbermot un Arger, dat keen Froonsmensch mit wull, hebbt se den Bootsteg hochbörd un ümklappt.

Dat ward all düster, liekers hett de Besitter dat mitkreegen un de Polizei anropen. Twee Beamte in Uniform keem un frogen, wat se dor moken. „Den Bootsteg hebbt wi hochklappt, de wer wackelig.“ Dor füng de Polizisten an to schimpen un wulln de Utwiese von de Schippers hebben. De hebbt ehr Paddels nohm un de Beamten afduscht un sünd utneiht.
Een Stünd loter keem se an den Wald vom Haselknick. Wat wer den dor los? Achter de Bööms stunn luder junge Polizisten mit witte Mützen ob. Se wern mit een Mannschaftsbus anrückt, un wulln de dree Schippers to Strecke bringen. Nun stunn se an`t Ufer un ropen anholln. De dree angedunten Schippers sprung in dat kole Woder un spritten een un anner Beamten natt. De Einsatzleiter hett sik de Alsterschlacht ankeeken un hett sik amüsiert. Dor kreegen ok de jungen Polizisten Spoß, se sprungen to Siet, un füngen an luthals öber sik to lachen.

De een segt: „,Den Dicken, de dor in`t Woder schwemmt, denn kenn ik, wie brukt keen Utwies.“ De Schippers sprüngen wedder in ehr Boot, föhn ob de anner Siet, lopen de Trepp hoch, wo een von jem tohuus wer. Sien Froo keem in`t Nachhemd rut, un empfing de dree natten, verkölten Schipperslüüd. De Polizisten hebbt sik wunnert; de Froo ropt: „Is alls in Ordnung.“

De Polizisten mit ehr natten Tüch ob de anner Siet meenen: „Wat is den dat?“ Se wern fürchterlich luthals an snaggen un lachen. Dor keem de Noberslüüd rut, wokeen mokt hier soveel Krach in de Nacht. Se meen, de Polizei mogt een Kammeradschaftsutflog – am Haselknick ward öfters mol nachts fiert. So ropen de Nobersch, se schulln nich de Nachtruhe stören, sonst gift dat een Anzeige, worob de Polizei afrückt.

De Schippers wern bannig kolt. Dor hett de Froo mittend in de Nacht hitt Woder in de Wann inlopen loten, de Mannslüüd müssen de natten Plünnen uttrecken, un se stopft all Dree in de hitte Wann. De natten Klamotten un de Geldschiens keem ob de Lien. De Schippers ward afdrögt, kreegen dröges Tüch un noch een Buddel Beer, dor no föhrt se de twee Mannslüüd mit ehr Auto no Huus. So stunden se borfoot vör jümmer Huusdör. Ehr Fronslüüd hebt sik wunnert, in welken Tostand se ehr Mannslüüd wedder kreegen.

De Nobersch hebt am nächsten Morgen frogt, wat dor los wer. Se meen, de Schippers kreegen nu een örnliche Strof obbrummt. De Angelegenheit is wohl as Spoß niedergeschlagen worden, un dor is nix no komen.
Hinni Jürjens