Klönschnack

23. April 2018

Winter ade!

Klönschnack mit Hinni

No den 2. Weltkrieg weern de Winter kold un to heizen geev dat keen Holt un Kohle. Ole Lüüd sünd in ehr Wohnung jämmerlich verfron.

To School müten wi as Kinner Briketts mitbringen, dormit de Schoolmester den Oben in den Klassenroom inböten kunn.

Veel Ünnericht kreegen wi nich, dorto wer dat to kold, poor Schoolobgoben un wi kunnen wedder no Huus un wi harrn Tied, den Sleden un de olen Schlittscheuh von Böhn to holln. Den güng dat ob den Fuchsbarg ton rodeln. Ob den flachen Hang kunn man sutje hendol, un wedder roploopen. Mitünner keems mit annere öber krüütz, ümkippt un büst in Snee fullen. Ob den Steilhang wer dat hobbelig un gefährlich, so mancheen hett sik door dat Krüütz kaputt mokt.

Wenn denn de Dümpels un Teiche tofroren weern, hebt wi uns door dropen. Dat Ies wer noch nich ganz seker. Denn hebt wi uns een Spoß mokt, wokeen wogt sik ob dat Ies? Wat dat woll hollen deit? Man mut bloots de richtige Technik hebben un snell noog sien. Dat weer ok een to scheunes Gefeuhl, so mit`n Wuppdi öber dat Ies to neihen, dat sik ünner dien Feut op un dool bewegen dä, so as wenn du op Gummi lopen deist. Dat knackt un du bist flink wieder achter di dat Gummiies. Mitünner wer man doch mit een Fout inbroken un harr een natten. Eenmol hebbt wi dat to dull mokt, ik wer natt as een Katt un dat bi strengen Frost. As ik wedder to Huus weer, is min Büx stief as een Brett wesen un min Öllern hebbt schimpt: „Ji ward noch mol in`t Ies versupen.“ Doch mit uns Technik is dat jümmer good gohn. In uns Kinnertied geev dat so veel Gefohr, wi hebbt in de Trümmerruinen speelt, scharbe Munition funnen, utstreut un dormit Füür mokt. Keen het besünners ob uns obpasst, bloots wi hebbt ob uns sülben obpasst und sünd mit de Gefohr grot worden.

Wenn dat Ies den dick nog wer, hebt wi uns olen Schlitscheuh ünner de Stebels dreiht, de kralln sik an de Sohl un Hacken fass. Ieshockey Stebels, Schläger un Puck harrn wi nich. Ut den Knick hebbt wi uns Hockeyschläger sneeden un een Blechdos weer uns Puck. Mitünner is de Hack vom Stebel afreeten, denn hebbt wi to de Schlittscheuh „Hackenafrieter“ segt.

Twee Mannschaften, Jungs un Deerns ward tosomenstellt. Wer keen Schlittscheuh harr, müss in`t Tor. Bit dat düster weer, hebbt wi Ieshocky speelt. Denn hebbt wi noch Spoß mit de Mägdens mokt. Mützen wegnohm un mit jem rümrangelt. Wat dat mit de Mägdens sonst noch ob sik harr, hebbt wi nich weeten. Keen hett uns obklärt. De Kinner bringt de Klapperstorch, schulln wi glöben. Dat dat so nich stimmen de, doröber hebbt wi uns ünnerholln, blots keen hett uns dat een beeten genauer segt. Herbert weer Einzelkind. Herberts Öllern hebbt em mit ob Weg geben, he schall de Deerns ut den Weg gohn, de wörn em bloots utnutzen un Arger moken.

Nu bi dat Hocky-
speeln
weern se doch ganz fix un Kala hett örnlich Tore mokt. De Jungs stoht tosomen un tuschelt. Herbert harr noch nie een nakte Froo sehn, he wörr togeern mol weeten, wo de fixe Kala mank de Behn utsitt. Nächsten Dag bring Herbert een Tüüt mit rode Appels mit. Wi wöllt wedder Mannschaften wählen
un stoot im Kreis tosomen, dor füng Herbert an to stottern, wenn Kala mol ehr Büx rünner trekt, dormit he mol sehn kunn, wo se utseht, den wörr se de heele Tüüt mit de roden Appels von em kreegen. Kala hett lacht un wüll nich. Dor hebbt wi segt, dat is doch nich slimm un deit nich weh, se schull sik nich so anstelln. De scheunen Appels sünd doch wunnerbor.

Dor stellt sik de fixe Kala in den Kreis, trekt ehr Büx dol, zieht blank un fix wedder hoch. Uns Herbert kunn gor nich so gau kieken, doch de Tüt mit de Appels mut he nu Kala geeven. Genaueres hett he nich mitkregen. Ok sonst weer nich an Obklärung, as dat hüüt in de School lehrt ward, to denken. Sexbilder weern streng verboten. De arme Herbert wüss nich, wo he sien Neugier stillen kunn.

Wi as Kinner in den 2. Weltkrieg sünd so grot worden. Uns Öllern harrn anner Sorgen, as ob uns rundüm to behüten. Unaufgeklärt möten wi uns an de Probleme ranfummeln un ob uns sülben obpassen. De Tieden hebbt sik ännert. Bi uns wer dat mitünner gefährlicher un spannender. De Kinner hüüt hebbt dat beeter, ward veel mehr behütet un obklärt un könt wat se weeten wüllt im Internet nokieken.De brukt keen Tüüt mit Appels, üm dennoch nich mol wat to sehn to kreegen.

Hinni Jürjens

Schlagwörter