Klönschnack

8. Oktober 2017

Kino in Duvenstedt

Dat harr wat am Duvenstedter Damm 43 in de föftiger Johrn. Wöllt wi mol am Sönnobend in Duvenstedt dor in`t Kino gohn? Am Montag müssen wie för Sünnobend Korten an de Kass rechtiedig bi Wiebrow köpen. Dat gift een Heimatfilm „Marieandel“ dat wer wat heel Besünderes to de Tied. In den Kinosool güng 140 Lüüd rin. Wi müssen gau hen, dat wi noch Korten afkreegen. De vörderste Rech 0,90 DM, denn 1,30 DM. Achtern 1,60 DM. 24 Lüüd stohn vör uns, liekers hebt wi noch 4 Korten to 1,30 DM kreegen un uns freit.
Sünnobend seeten wi Rech fief, dat geef vör dat Vörprogramm noch een Inlog. Vör den Vorhang ward een Disch henstellt. Een seuter Duvenstedter Jung, Bubo Iden tein Johr old, stellt sik ob den Disch, dat all Lüüd em good sehn un hörn kunnen. He hett dat Leed „Marieandel, du hest min Hart am Bandel, Bandel“, so seut sung, oh nee, dat güng an`t Hart. Bi de Froonslüüd kullerten de Trons.

Den keem de aktuelle Vörschau, Louis Armstrong schall in Hamborg een Konzert geeven, un VW lebert die vörbestellten Käfer ut, 2500 DM schulln se kosten. Dat weer wat för rieke Lüüd. De lange Hein ten Hoff is Box-Europameister worden. Dor kunst de slechten Tieden no den 2. Weltkrieg vergeten.

Bi den Heimatfilm wischen sik wedder welk mit Daschendöcker de Ogen frie. Wo wer dat scheun! Denn wer de Film to End, de Döörn güng ob, buten is dat düster worden. All wern glücklich un tofreden. De groten Jungs moken noch een poor Streiche ob`n Heimweg, se drücken bi Tante Frieda ob den Klingelknoop un sünd weglopen, een Gartenport uthangt un versteken. So wer dat dormols mit den Kinobesök in Duvenstedt.

31 John loter fiert Anni Fuchs Richtfest, se wull den Arger mit de Baubehörde vergeten. Se harr een lütte Veranda anbout, bi de de Behörde twischendörch mit een roden Zettel den Bou still legt hett. Mit veel Arger dörf se de Veranda wieder boun. To`n Richtfest hett se sik nich lumpen loten. Ok ehr nu söbentig Johrn old worden Fründinen wern dor, ok de Handwarkers, mittenmang Muermann Bubo Iden. De Hanwarkers un ehr Fründinen hebt örnlich bi den Köm un Beer tolangt, so wern se in Stimmung komen.

Wet ji noch, as dat in Duvenstedt een Kino geven hett, un as Bubo as Junge dat Leed „Marieandel, du hest min Hart am Bandel, Bandel“, sungen hett? Bubo wüss nich wo he henkieken schull, dat wör em pienlich.
Sowat Scheunes gift dat nu nich mehr, hebt se segt. Dor schenkt Anni Bubo noch een Köm in. Dat is de letzt, mehr dörfst du nich, segt se listig, anners, du müsst noch mol „Marieandel“ singen. De Köm wer good, he ziert sik noch. Se schenkt em noch een in.

Dor steit he ob. De Fronslüüd stellt de Stöhls as in`t Kino trech, so seeten se nebeneenanner. Bubo füng an to singen, „Marieandel, Marieandel du hest min Hart am Bandel, Bandel“, se kregen ehr Daschendöcker rut, un Bubo müss noch een togeven. Se schwelgen in Erinnerungen von dat Duvenstedter Kino. Dat wer so komodig in dat lütte Kino un nu dat best Richtfest bi di, se harn nich mol Tied rechtiedig ob WC to gohn.

Dat Kino geev dat noch bit 1968, denn harn de Lüüd all tohuus een Puschenkino. In dat historische Huus wer dormols dat Gasthaus zur Post mit Poststation un dat Lichtspielhaus.

Dat Huus is 1969 afbrennt, dorno een poormol umbout worden. Nu gift dat dor Ristorante Italia Pizzaria, Teppichhaus, Caros Café un een Hairdresser, wo keen seuten Jung mehr so scheun singen deit.
Wat hebt sik de Tieden ännert.

 

Irene Wiebrow
Hinni Jürjens