Klönschnack

20. Mai 2019

Fröher wer allns beeder.

In de Gaststuuv het Franzi, de Quarkbüdel, vertellt, fröher wer allns beeder as hüüt.
Heini meent, ganz fröher, dor hebbt de Lüüd in een kole Höhl haust.
De Mannslüüd güng ob Jacht, de Frunslüüd hebt sik dree von de
Männer mit Knöv nohm, se dachten, so kreegen se de besten Kinner mit Knöv. Meenst du, de harn dat beeder?

Franzi meent, jüst dorno wer dat beeder, dor hebbt se sik Holthütten boet,
Korn anboet, Füer mokt un harrn een fines Leeven. För den Winter harrn se Korn im Speicher un keen Not.
Heini meent, dat wer ok nich so good. Dor keem de Neid ob. Ut den Speicher hebt se klaut un sik gegensidig dodhaut. Se hebt sik um de Frunslüüd kloppt un Blutrache wer ansegt. De Frunslüüd sünd bi de Geburt veelmols dodbleeben.
Dat geev dor Sklaven un frie Lüüd, de Sklaven güngen leer ut.
De Neandertaler wern een Rasse, de to de Tiet utrott worden is.

Meenst du, dor güng de Lüüd dat beeder as hüüt?
Franzi segt, in de Tiet dorno kunn de Lüüd schrieben un hebt Ordnungsgesetze mokt. De Römer hebt een Imperium obbout un för Ordnung sorgt, dor güng de Lüüd dat good!
Heini meent, de Gesetze wern good för de Patrizier, dor geev dat Kriege, wo de Lüüd
afschlacht worden sünd. Herodes het de lütten Kinner von sin Soldoten dot haun loten.
De Christen hebt se im Colloseum obfreeten loten. De Frunslüüd wern Friwild.
Meenst du de Tied wer beeder?
Franzi meent, jüst im Mittelalter harn de Lüüd genog to eeten, se hebt grote Karken boet, dor geev dat veele fromme Lüüd, Burgen un Klöster, wo se seker leeven kunnen.

Mit Reisekutschen kunn se dörch de romantische Landschaft kutschieren.
Heini segt, dat hört sik good an. Weest du ok, dat de frommen Lüüd kriegerische
Kreuzzüge mokt hebt? Denn geev dat den dörtigjährigen Krieg, wo se allns twei mokt hebt.
De Buern uträubert un de Frunslüüd vergewaltigt hebt. De olen Frun as Hexen verbrennt hebt. De romantischen Kutschen wern von de Raubritter nich seker.
Wer dat in de Tiet besünners good?

Dat mach woll ween, segt Franzi. De Neuzeit wer aber good. Denk mol an de besündere Kultur.
Goethe, Schiller, Beethoven, Strauß. Maschinen hebt de schwore Arbeit afnohmen.
Revolutionen for Freiheit, Gleichheit, Brüderlichkeit. De Buern sünd frie Landlüüd worden, dor harrn wi noch een Kaiser!
Jo jo, segt Heini, wat is dorbi rutkomen?
Kulturrevolution, Kommunismus, Gleichheit ward bi de Kommunisten mit Freiheit betolt. Nationalsozialismus mit Völkermord, Hitler , Stalin usw. Keneen wer seker.
As Kind heff ik dat noch mitbeleevt. Twee Weltkriege, Atombomben in Japan, denk mol dor an.
Ne ne, Franzi ! Du hest nu 70 Johr in Dütschland in Freeden leevt un segst, fröher wer allns beeder, dat glööv ik nich.

De Medizin is so wiet, dat du 90 Johr warden kannst.
Wat de Tokunft angeiht, weet keen Mensch.
De Wissenschaftler segt: In 50 Johrn ward
de ersten Lüüd unsterblich mokt. Wat dat wohl afgeben deit oder de Menschheit geiht kaputt, dormit sik de Natur wedder erholen kann.

Jo, segt Franzi, dor mut ik mol öber nodenken.

Hinni Jürjens